Одил Абдумажидов легионерга айланадими ёки Суперлигамизда қоладими? Футболчи нима дейди?

Ўтган мавсумни “Олимпик” таркибида ўтказган Ўзбекистон олимпия терма жамоаси аъзоси Одил Абдумажидов 2024 йилда фаолиятини яна бошқа клубда давом эттириши кутилмоқда.

Ҳозирча у бирор клубда эмас, аммо бу вақтинчалик ва тез орада Абдумажидовни янги клубда кўрсак ажаб эмас. Футболчи “Олимпик” таркибида 2023 йилги мавсумда 29 учрашувда майдонга тушиб, 2 та гол урди.

Sports.uz журналисти Одилнинг кейинги режалари билан қизиқиб кўрди.

- Икки йил аввал легионер сифатида “Ордабаси”да эдингиз, ўтган йили эса “Олимпик”да тўп сурдингиз. 2023 йилда “Ордабаси” чемпион бўлди. Қарорингиз тўғри чиққанига амин бўлдингизми ёки...

- Албатта, танловим тўғри чиқди, деган умиддаман. “Олимпик”да кўп нарса ўргандим. Ўйлашимча, ҳар томонлама тажриба ўрганиб, ўсдим деб ўйлайман.

- “Олимпик”ни тарк этдингиз. Бундай қарорга келишингизни асосий сабаби нимада? Бу тўсатдан бўлдими ё аввалроқ режалаштириб қўйганмидингиз?

- Бу жамоага ижара асосида боргандим. Амалдаги шартномам эса “Металлург” билан ва 2024 йилда тугайди. “Олимпик”ни тарк этдим, дейишим нотўғри. Чунки бу олимпия терма жамоамиз негизи ҳисобланади.

- Сиз ўйнаётган позицияда Ўзбекистондаги энг кучлиси деб кимни кўрсата оласиз?

- Олдинги пайтда Анзур Исмоиловни айтардим. Ҳозирги ўйнаётганлар орасида энг зўри Абдуқодир Ҳусанов деб ўйлайман. У бекорга “Ланс”да ўйнамаяпти.

- Одилжон, янги мавсумни қайси клубда бошлаш ҳақида бир қарорга келдингизми? Билишимча, вариантларингиз бор...

- Ҳали бир қарорга келганим йўқ. Янги жамоам тез кунларда аниқ бўлиб қолади. Ҳозир музокаралар жараёни давом этяпти.

- Яна хорида тўп сурмоқчимисиз ёки юртимизда қолиш ҳақида ўйлаяпсизми?

- Яширмайман, хориждан 2-3 та таклифлар бор. Уларни кўриб чиқяпмиз. Агар ҳар томонлама қониқтирса четда тўп суришим мумкин. Акс ҳолда яна ўзимизда ўйнайман.

- Хорижда айнан қайси мамлакатлардан қизиқишлар бор ва музокаралар ҳозир қайси босқичда?

- Айрим давлатлардан бўляпти. Номини айтмай турганим маъқул. Яқин кунларда ўхшаб қолса хабар топасизлар.

- Ҳозирда спорт формангизни ушлаб туриш учун қаерда шуғулланяпсиз?

- Ўзим шуғулланиб турибман. Худо хоҳласа, бир неча кун ичида янги клубим аниқ бўлиб қолади. Ўшанда жамоамга қўшиламан.

- “Металлург”га қайтмайсизми? Улар қайтариш ҳаракатида эмасми?

- Қайтишим ҳам мумкин. Чунки айтганимдек, шартномам бор. Ҳали бир қарорга келмадик. Ҳаммасини кўриб чиқяпмиз.

Шуҳратбек Жўраев.