"Нефтчи"нинг украиналик легионери: "Мухлисларингиз жуда талабчан экан..."

"Нефтчи" клуби матбуот хизмати жамоа сафига янги келиб қўшилган украиналик легионер Юрий Батюшин билан кичик интервью уюштирди. Қуйида ушбу интервьюни тўлиқ мутолаа қилишингиз мумкин.

- Ўзбекистонга хуш келибсиз! Юртимиз ҳақида қандай тасаввур пайдо бўлди?

- Раҳмат. Юртингиз ҳақида шуни айтишим мумкинки, биринчи таассуротларим жуда ижобий. Маҳаллий аҳоли томонидан илиқ мунособат ва ҳар томонлама кўмаклашишга тайёр эканлиги яққол сезилмоқда, янги иқлимга кўникиш қийин бўлмайди, деб ўйлайман.

- "Нефтчи" жамоасига келишингиз қандай содир бўлди?

- Жамоага келишим агентим орқали содир бўлди. У менга "Нефтчи" вариантини таклиф этди ва бир ҳафта ўтгач, мен жамоага келиб қўшилдим.

- Ўзбек футболчиларидан кимларни танийсиз?

- Ўзбекистонда фаолият олиб бораётган юртдошим Андрей Мишенко билан илгари таниш бўлганмиз, чунки у билан бирга Украинада тўп тепиш насиб этган.

- "Нефтчи" тарихий ва ўзига яраша анъаналари бор клуб. Уни қанчалик ўргандингиз?

- Жамоанинг анъаналари ва тарихига келсак, ҳали танишиб улгурмадим. Имкон қадар тез фурсатларда ушбу камчиликларни бартараф этишга ҳаракат қиламан. Мен билганим, мухлислар жуда талабчан экан.

- Сизни жамоа сафидаги фаолиятингизга омад тилаб қоламиз.

- Раҳмат, худо хоҳласа тез орада жамоа мухлисларини хурсанд қилишга ҳаракат қиламиз.

Манба: "Нефтчи" ПФК матбуот хизмати.