Мессининг иш ҳақи маълум бўлди

МЛС футболчилар уюшмаси 2025 йилнинг  октябрь ҳолатига кўра лигак клубларида ўйнаётган чарм тўп усталарининг маошлар рейтингини эълон қилди.

Унга кўра, лиганинг энг кўп маош олувчи футболчиси сифатида Лионель Месси кўрсатилган. Ҳозирда “Интер Майами” саккиз карра “Олтин тўп” соҳибига ҳар мавсум учун 20,4 миллион доллар миқдорида маош тўлаяпти.

Иккинчи ўринни ёзда “Тоттенхэм”даги фаолиятини якунлаб, “Лос-Анжелес” га кўчиб ўтган Сон Хён Мин (11,2 миллион доллар) эгаллади.

 “Интер Майами”га “Барселона”дан келган машҳур испан футболчиси Серхио Бускетс 8,8 миллион доллар миқдоридаги йиллик маош билан учинчи поғонадан жой олди.

Энг катта маош олаётганлар бешлигига  “Атланта Юнайтед” вакили  Мигель Альмирон (6,1 миллион доллар)  ва “Сан-Диего” ўйинчиси Ирвинг Лосано (6 миллион доллар) кирди.

Шунингдек, МЛСда футболчилар маошига энг кўп маблағ сарфлайдиган клуб “Интер Майами” бўлиб чиқди. Бу клубнинг бир йиллик маошлар фонди 48,97 миллион долларни ташкил қилди. Кучли учликдан “Лос-Анжелес” (30,1 миллион доллар) ва “Атланта Юнайтед” (28,48 миллион доллар) олган. Чемпионатнинг энг камхарж жамоаси бўлган “Монреаль Импэкт” ўз ўйинчиларнинг йиллик маоши учун 12, 92 миллион доллар сарфлайди.