Messi ortidan Aguero ham “Barsa”dan ketishi kutilyapti

“Barselona” yozda “Manchester Siti” hujumchisi Serxio Agueroni erkin agent sifatida o‘z safiga qo‘shib olgandi.

Argentinalik yulduz hamyurti Messini kataloniyaliklar bilan yangi bitimga ko‘ndirishi kerak edi. Biroq keyinchalik klub rahbariyati Leoni istagan taqdirda ham u bilan shartnoma imzolash uchun imkon topa olmadi.

Endi Aguero ham Kataloniya tark etishi mumkin. Ma’lumotlarga qaraganda, “Chelsi” va “Tottenxem” xo‘jayinlari “Manchester Siti” tarixidagi eng zo‘r to‘purarni yana Angliya chempionatiga qaytarmoqchi. Agueroning o‘zi Kataloniyaga faqat Messi bilan birga o‘ynash ishtiyoqiga kelgan va hatto zaxira hujumchisi bo‘lishga rozilik bergan edi.

33 yoshli hujumchi endi jamoasini o‘zgartirmoqchi. “Barsa” ham tekinga kelgan o‘yinchisini 10-15 million funtga qo‘yib yuborishga tayyor. Aguero “shaharliklar” safida 390 ta uchrashuvda maydonga tushib, raqiblar darvozasiga 260 ta gol urgan va 73 ta golli pas uzatgan.