Мбаппе “Барса” энг ёмон кўрган ўйинчига айланиб қолди

Испания чемпионати ўнинчи турининг марказий учрашуви Мадриддаги “Сантьяго Бернабеу” стадионида ўтказилиб, унда “Реал” ашаддий рақиб “Барселона” футболчиларини 2:1 ҳисобида мағлубиятга учратди.

Лига тўпурари Килиан Мбаппе “эл-класико”да ҳисобни очди ва иккинчи бўлимда пенальтидан фойдалана олмади. “Барселона” дарвозасига киритилган тўп 26 ёшли франциялик юлдуз учун тарихий аҳамият касб этди.

Мбаппе Испания жамоалари орасида энг кўп голни айнан каталонияликларга урган. Килиан фаолияти давомида 12 марта “Барса” дарвозасига йўл топди.

Шунингдек, моҳир ҳужумчи Францияда ўйнаб юрган даврида “Дижон”, “Мец” ва “Марсель” билан кечган баҳсларда ҳам рақибларига 12 тадан тўп киритган.

Бу борада Мбаппенинг энг севимли жамоалари “Лион” ва “Монпелье” ҳисобланади. “лион” дарвозабонлари унинг зарбасидан кейин 13 та тўпни ўз дарвозасидан олиб чиққан. “Монпелье” эса, Мбаппе қарши ўйнашдан безиб қолган. Бу жамоа моҳир тўпурардан 15 та гол ўтказган.