Мадрид клуби қоладиган ва кетадиган юлдузлар рўйхатини эълон қилди

Жорий мавсум Мадриднинг “Атлетико” клуби чемпионлик учун курашда “Барселона” ва “Реал”га етарли даражада қаршилик кўрсата олмади.

Аргентиналик бош мураббий Диего Симеоне ҳозирдан келаси мавсумга тайёргарликни бошлаб юборди. Тажрибали мутахассис биринчи навбатда жамоасига керакли ўйинчиларни аниқлаб олди ва клуб раҳбариятини бу футболчилар бўйича таклифларни қабул қилмасликка чақирди.

Fichajes сайтининг маълум қилишича, Симеоне етти футболчининг асосий таркибдаги жойини кафолатлади. Бу рўйхатдан Ян Облак, Маркос Льоренте, Робин Ле Норман, Пабло Барриос, Жулиано Симеоне, Александр Сорлот ва  Хулиан Альварес жой олди.

Диего Симеоне учун энг муҳим ўйинчилардан бири аргентиналик Родриго де Полдир. Унинг шартомаси 2026 йилнинг ёзигача давом этади. Жамоа етакчиси билан янги битим бўйича ҳали келишувга эришилгани йўқ.

Клуб мутасаддилари агар Родриго шартномани имзоламаса, ёзда уни сотиб юборади. Шунингдек, Хосе Мария Хименес, Науэль Молина ва Конор Галлахер каби кучди футболчилар ҳам бошқа клубларга ўтиб кетиши мумкин.

Мураббийлар штаби янги мавсумда Хави Галан, Коке ва Гризманн каби етакчи ўйинчиларга суянмасликка қарор қилган.