Гвардиола йирик ғалабадан кейин гол урган футболчини танқид қилди

Англия премьер-лигасида чемпионлик учун курашаётган “Манчестер Сити” 16-тур учрашувини сафарда ўтказиб, “Кристал Пэлас” дарвозасига жавобсиз учта тўп киритди.

Голлардан иккитасини Эрлинг Холанд урган бўлса, кейинги пайтда анча самарали ўйнаётган Фил Фоден ҳам рақиб дарвозасини ишғол қилишни уддалади.

Қизиғи шундаки, учрашувдан кейин айнан Фил Фоден бош мураббий Хосеп Гвардиола томонидан танқидга учради.

- Бугун Фоден энг яхши даражада ўйнагани йўқ, у кўп тўп йўқотди. Ҳар бир ҳаракатда шошилди, у хотиржамроқ ўйнаши, тўпни яхшироқ назорат қилиши ва керакли пайтда тезликни ошириши лозим.

Шу билан бирга, у жамоа учун ажойиб иш қилаётганини ҳам алоҳида эътироф этиш керак, - деди Хосеп Гвардиола.

Фил Фоден жорий мавсумда Пнглия Премьер-лигасида 14-учрашувини ўтказиб, голлари сонини еттитага етказиб олди.