Футболчи жаҳон чемпионатига бориш учун жамоасидан кетмоқчи

Англиянинг амалдаги чемпиони “Ливерпуль” ярим ҳимоячиси Харви Эллиот янги мавсумни бошқа клубда бошлашга тайёргарлик кўрмоқда.

22 ёшли футболчи “Ливерпуль”га бўлган меҳрини яшираётгани йўқ. Бироқ Харви ўтган мавсумда Премьер-лигада атиги иккита учрашувда бошланғич таркибга киритилди холос.

Эллиот Англия терма жамоасига номзодлардан бири. Келаси ёзда АҚШ, Канада ва Мексикада бўладиган жаҳон чемпионатида қатнашувчи таркибга кириш учун у мунтазам ўйин амалиёга эга бўлиши ўта зарур. Шу боис, Харви оғир қарор қабул қилишига тўғри келади.

- Ҳаммаси жуда оддий. Агар ўзимга қолса, бутун фаолиятимни “Ливерпуль”да ўтказган бўлардим. Мен клубни яхши кўраман. Лекин келажакда мен учун нима яхшироқ бўлишини ўйлашим ҳам керак. Мақсадларим жиддий ва катта. Мен жаҳон чемпионатида ўйнамоқчиман, - деди Харви Эллиот.

Ҳозирча, Харви Эллиот қайси клубга ўтиши ҳақида аниқ маълумот йўқ. Бироқ бу даражадаги ўйинчи эътибордан ташқарида қолиб кетмайди.