Флик кечиккан Ямални нега жазоламади?

“Барселона” бош мураббийи Ханс-Дитер Флик аввалроқ кечиккан футболчиларни ўйин ёки машғулот олдидан захирага қолдириб жазолаган ҳолатлар бўлган.

Бироқ AS нашри маълумотига кўра, Ламин Ямал бу сафар жазодан қутулиб қолган. У Чемпионлар лигасидаги ПСЖга қарши (1:2) ўйин олдидан йиғилишга ўз вақтида келмаган бўлса-да, асосий таркибда майдонга тушган.

Cadena SER журналисти Ману Карреньонинг сўзларига кўра, спорт директори Деку вазиятга аралашган ва Фликни Ямални захирада қолдирмасликка кўндирган. Немис мутахассис эса қарорининг шубҳа остига олинганидан мамнун бўлмаган, чунки унинг фикрича, жазо қўлланилса, у барча учун тенг бўлиши керак.

Маълумотларга кўра, жамоа ичида Ямалга нисбатан чора кўрилмагани бошқа футболчиларнинг ҳайратига сабаб бўлган. Масалан, Жюль Кунде, Рафинья ва Иняки Пенья шунга ўхшаш ҳолатлар учун жазоланган эди.