Фигурали учиш: Спортчиларимиз қишки Олимпия ўйинлари йўлланмасига эга бўлди

АҚШнинг Бостон шаҳрида фигурали учиш бўйича катталар ўртасида ўтган жаҳон чемпионатининг сўнгги куни Ўзбекистон терма жамоаси аъзолари учун муваффақиятли кечди.

Чемпионатнинг жуфтлик йўналишидаги эркин дастур беллашувларида Ўзбекистон терма жамоаси аъзолари Екатерина Гейниш ва Дмитрий Чигирев 120.68 очко қўлга киритиб, мусобақани 183.01 балл билан 10-ўринда якунлади ва 2026 йил Италиянинг Милан ва Кортина-Д’Ампеццо шаҳарларида бўладиган XXV қишки Олимпия ўйинлари йўлланмасини қўлга киритди.

Терма жамоамиз аъзоларининг жаҳон чемпионатидаги муваффақиятли иштироки туфайли Ўзбекистон вакилларига сентябрь ойида Пекинда ўтадиган лицензион турнирда яна бир йўлланма учун кураш олиб бориш имконияти тақдим этилди.