Фердинанд "Манчестер Юнайтед" футболчиларига маслаҳат берди

Рио Фердинанд "Манчестер Юнайтед" футболчиларига Беньямин Шешкого кўпроқ тўп бериш кераклигини айтди.

"Унга шунчаки тўпни узатинг! У билан ҳимоячиларга осон бўлмайди. Уни ўйинга қўшинг, рақибни ҳимояланишга мажбур қилинг. Лекин биз унинг атрофида тўпни айлантириб юрамиз. Баъзан ҳаммаси оддий, асосий нарсаларга бориб тақалади.

Таҳдид ярата оладиган футболчига пас бериш керак, биз эса аксинча йўл тутяпмиз. Мана шу менинг асосий эътирозим – биз унинг кимлигини, майдонда нима қилаётганини кўрмаяпмиз.

Агар у пас қабул қилиб, ҳеч нарса қила олмаса ҳам, бу ҳолатда камида биз унинг қайси даражада эканини тушуниб оламиз. Ҳозир эса у ким ва нима иш қилаётганини англай олмаяпман.

Мен ҳеч кимни алоҳида айбламоқчи эмасман, аммо жамоадошларга мослашишида ёрдам бериш – мажбуриятдир", – деди МЮнинг собиқ ҳимоячиси ўзининг "Rio Ferdinand Presents" шоусида.