Доннарумма бизга ҳам керак эмас

Италиялик дарвозабон Жанлуижи Доннарумма “Пари Сен-Жермен” томонидан трансферга қўйилганидан кейин унга Англия Премьер-лигасининг “Челси” ва “Манчестер Юнайтед” клубларидан қизиқиш бўлаётгани ҳақида хабарлар тарқатилган эди.

Бироқ таниқли журналист Бен Жейкобс “Челси” масаласига ойдинлик киритди. Унинг таъкидлашича, лондонликлар ва Доннарумма ўртасида ҳеч қандай алоқа мавжуд эмас. “Аристократлар” бу дарвозабон бўйича музокарага киришмагани айтилмоқда.

26 ёшли Доннарумма парижликларга керак бўлмай қолди. ПСЖ раҳбарияти дарвозани қўриқлаш масъулиятини “Лилль”дан трансфер қилинган Шевальега топширмоқчи.

Жанлуижи Доннарумма клуб томонидан УЕФА Суперкубоги учун бўладиган учрашув қайдномасига ҳам киритилмади. Бу ўйин 13 август куни “Тоттенхэм”га қарши ўтказилиши белгиланган.