Чемпионлар лигасига чиқсак, учта суперфутболчини трансфер қиламиз

“Челси” раҳбарияти жамоани яна Европа футболи чўққисига қайтаришни мақсад қилган. Айни пайтда “аристократлар” Англия Премьер-лигасида Европа Чемпионлар лигасининг навбатдаги мавсумига йўлланма берувчи ўринлар учун курашмоқда.

Агар бу вазифа бажарилса, клуб хўжайинлари учта катта трансферга пул ажратади. Хўш, “Челси” нишонидаги суперфутболчилар кимлар?

Дин Хёйсен – бу футболчи жамоа ҳимоя чизиғини мустаҳкамлаш учун олиб келинади. Динга “Реал” ҳам кўз тикиб турибди, бироқ “аристократлар” талаб қилинаётган суммани бирдагига тўлаб, ортиқча савдосиз Хёйсенни олиб кетмоқчи.

Виктор Дьёкереш – тинимсиз гол ураётган ҳужумчи бир неча клублар қатори “Челси”нинг ҳам асосий нишони ҳисобланади. 75 миллион еврога баҳоланаётган швед футболчисини олиш учун лондонликлар “Манчестер Юнайтед” рақобатини енгиши керак.

Родриго Гоэс – “Реал”га Килиан Мбаппе келганидан кейин иккинчи планга ўтиб қолган бразилиялик футболчининг ишқибозлари кўп. Ҳужумни сезиларли даражада кучайтирадиган универсал ўйинчи учун “Челси” 100 миллион евродан кўп маблағ сарфлашга тайёр.