Артета уч ноёб истеъдодни нишонга олди

Англия Премьер-лигасида пешқадамлик қилаётган “Арсенал” аллақачон ўзининг спорт лойиҳасининг кейинги босқичини режалаштирмоқда.

Микель Артета бошчилигидаги “тўпчилар” январь ойида катта харидларни амалга оширишга шошилмайди, аксинча, бор эътиборини жамоа ўйинини янада шакллантириш ва ривожлантиришга қаратишни маъқул кўряпти.

Аммо скаутлар аллақачон “Арсенал”нинг ўйин фалсафасига ва юқори прессинг ҳамда тўп назоратига асосланган тизимига мослаша оладиган футболчиларни излашни бошлаб юборган.

“Канонирлар” бош мураббийи Микель Артета ўрта ёки узоқ муддатли истиқболда жамоани кучайтиришга қодир бўлган уч нафар истиқболли ёш футболчини аниқлади. Булар Айюб Буадди, Леннарт Карл ва Марк Касадо.

Лондон клуби мутасаддилари айни пайтда Европа футболида порлай бошлаган бу ўйинчиларни трансфер қилиш бўйича махсус стратегик йўналишни ишлаб чиқишга киришгани айтиляпти.