Алонсо “Реал” юлдузининг клубдаги келажагига нуқта қўйди

Ўтган ёзда “Реал” бош мураббийига айланган Хаби Алонсо жамоа таркибини ўзининг ўйин услуби ва талабларига мослаштириб боришга алоҳида эътибор қаратмоқда.

Бу жараёнда испаниялик мутахассис ёши катта ўйинчилардан воз кечиб, жамоада авлодлар алмашинувини бошлаб юборган.

Bild нашрининг ёзишича, Алонсо “Реал”нинг ҳимоя қўрғонига етакчилик қилиб келган Антонио Рюдигердан воз кечишга қарор қилди. Германиялик футболчининг клуб билан шартномаси жорий мавсум охирида якунига етади.

Манбага кўра, бош мураббий 32 ёшли футболчининг барқарор ўйин кўрсата олмаётгани ва жароҳатларга мойил бўлиб қолганига эътироз қиляпти. Алонсо ҳимоя марказида Эдер Милитао ва Дин Хёйсен тандемига ишонч билдиряпти.

Антонио Рюдигер каби катта маош учун ўйнайдиган футболчини жамоа захирасида олиб ўтириш клубнинг иқтисодий манфаатларига тўғри келмаслиги айтилмоқда.