Роналду Франциянинг энг зўр тўпурарини “Ан-Наср”га олиб келяпти

Криштиану Роналду “Ан-Наср” билан амалдаги шартномасини яна икки йилга узайтирганидан кейин клуб раҳбариятига трансферларда ёрдам бериб келмоқда.

Португалиялик юлдуз бу орқали таркибни кучайтириш ва соврин ютишни мақсад қилган. Хусусан, “Челси”дан Жоау Феликснинг Риёд клубига келишида ҳам Роналду асосий ролни бажарди.

Marca нашрининг хабарида Криштиану Роналду “Марсель”да порлаётган Мейсон Гринвудни “А-Наср”га жалб қилиш учун фаол ҳаракат қиляпти.  

2024 йилнинг ёзида “Манчестер Юнайтед”дан кетган 23 ёшли ҳужумчи Франция чемпионатидаги дебют мавсумида 34 та учрашувда 22 та гол уриб, тўпурарлар пойгасида ғолиб чиқди.

Трансферлар бўйича экспертлар “Ан-Наср”га Гринвудни олиш қийин бўлишини таъкидлаяпти. Чунки “Марсель” раҳбарияти яна тўрт йиллик шартномаси бор англиялик футболчини лойиҳанинг асосий фигураси сифатида белгилаган ва таркибни шунга мослаб тузмоқда.