Романо Симонсни ўртоқлик учрашувида иштирок этмагани ва жамоани тарк этмоқчилиги ҳақида ёзди

"РБ Лейпциг" янги мавсумга тайёргарлик доирасида шанба куни "Аталанта"га қарши ўртоқлик учрашуви ўтказди. Бироқ, жамоанинг етакчи ярим ҳимоячиларидан бири Хави Симонс ушбу ўйинда иштирок этмади.

Футбол инсайдери Фабрицио Романонинг тарқатган маълумотга кўра, бу ҳолат футболчининг "Челси"га ўтиш истаги билан боғлиқ.

"Симонсда на жароҳат, на бошқа муаммолар бор. У "Челси"га ўтиш истаги туфайли ўйинни ўтказиб юборди. Сигнал аниқ: Хави жамоани тарк этмоқчи", — деб ёзади Романо ижтимоий тармоқларда.

Маълумот учун, 22 ёшли нидерландиялик футболчи Transfermarkt портали баҳолашича, ҳозирда 70 миллион евро туради. Симонснинг трансфери яқин кунларда ёзги бозорнинг энг йирик воқеаларидан бирига айланиши мумкин.