"Пахтакор" устози: "Тўлиқ ҳимояланган "Шўртан"га қарши қийналдик"

Суперлиганинг 22-турида аутсайдер “Шўртан” клуби ўз уйида “Пахтакор”ни қабул қилди. Қийин ўтган учрашувда ҳисоб очилгани йўқ. Беллашувдан кейинги матбуот анжуманида “Пахтакор” бош мураббийи Камолиддин Тожиев матбуот анжуманида иштирок этди.

- Бизга қийин бўлди. “Шўртан” иккала бўлимда 10 киши билан ҳимояланди. Ўтган ўйинда 10 футболчи бўлиб ўйнаб, кўп куч йўқотдик. “Шўртан”ни тўлиқ учрашув давомида ҳимояланганидан ва ўз имкониятларимиздан фойдалана олмадик.

- Бугунги ўйинга жамоангиз яхши натижа билан етиб келганди. “Андижон”га 6 та гол урилган, “Нефтчи” мағлуб этилди. “Шўртан” билан ўйиннинг 0:0 тугаши рақибнинг охирги ўринда бораётгани футболчиларингизга руҳий таъсирини ўтказа олдими?

- Руҳий таъсир ҳам бўлиши мумкин. Лекин олдинги учрашувда майдонда 10 футболчи қолиб кўп куч йўқотдик. Бу учрашувда ҳимояланган “Шўртан” жамоасига қарши бироз қийналдик.

- Ўйин олдидан 10 кишилик ҳимояни тасаввур қилганмидингиз?

- Ҳа, билардик.

- Футболчи алмаштиришлар ўйинга қанчалик таъсир ўтказа олди?

- Барибир кўп йигитлар чарчаганди. Янги кучларни чиқардик. Нима бўлганда ҳам 10 киши ҳимояланаётган жамоага қарши ўйнаш қийин. Вазият яратиш ҳам осон эмас. 20-30 метрдан ҳимояланяпти. Бўш ҳудудлар топиш оғир.

- “Пахтакор”ни ўйини ва натижасидан сизда қониқиш ҳисси борми?

- Қониқиш? Ютишга келгандик. Гол ура олмадик, қониқамиз, нима ҳам дердик?!

- Август ойи охирида жамоага Тимур Кападзе бош мураббий бўлиши ҳақида гап-сўзлар чиқди. Мана шундай пайтда жамоада нималар ўзгарди ёки нималар рўй берди?

- Ҳеч нима рўй бергани йўқ. Ижтимоий тармоқларда ёзилганди. Билмайман.

- Сизнингча, “Шўртан” клубида энг яхши ўйинчи ким?

- Дониёр Нарзуллаев бўлса керак.