Неймарнинг қачон сафга қайтиши кундан-кунга ойдинлашмоқда

"Сантос" етакчиси Неймар жароҳатдан сўнг майдонга қайтиш учун кучли тарзда тайёргарлик кўрмоқда. У 17 апрель куни Бразилия чемпионатида "Атлетико Минейро"га қарши ўйинда (2:0) чап сон мушагидан жароҳат олган ва 34-дақиқада алмаштирилган эди.

UOL нашрининг хабар беришича, 33 ёшли ҳужумчи клуб базасида ҳафтанинг бир неча куни "икки смена"да машқ қилиб, кунига 11 соатгача вақт сарфлаяпти. Қайтиб тикланиш жараёни қониқарли кетмоқда.

Тиббий гуруҳ маълум қилишича, Неймар врачлар тавсияларига тўлиқ амал қилмоқда ва унинг майдонга қайтиши май охири ёки июн бошига режалаштирилган. "Сантос" шифокорлари таъкидлашича, футболчи ҳеч қачон бу қадар кўп машғулот ўтказмаган.

Неймарнинг клуб билан шартномаси 30 июнгача амал қилади. Яқин кунларда томонлар келишувни узайтириш масаласини муҳокама қилишлари кутилмоқда.