Мората: "Уйқуга кетиб уйғонмасликдан қўрқардим"

Альваро Мората депрессия туфайли Евро-2024 турнирини ўтказиб юбориш учун ўзини жароҳат олганга солишни ўйлаганини айтди.

Испания терма жамоаси ҳужумчиси бу ҳақда "Улар кимлигимни билишмайди" номли ҳужжатли фильмда сўз юритди. У фаолияти давомида тўпланган танқидлар уни "руҳий тушкунлик"ка олиб келганини ва ўзини "бутунлай синдирилгандек" ҳис қилганини айтди.

"Менда кўплаб даҳшатли, ўз-ўзини йўқ қилувчи фикрлар бор эди. Еврога бормаслик учун жароҳатни симуляция қилиш фикри ҳаёлимдан ўтган эди.

Тананинг турли жойларида нимагадир оғриқ сезишни бошлайсан ва нима учун бундай бўлаётганини тушунмайсан. Оёқларим оғрирди. Кўкрагим қисилиб турарди. Нафас ололмасдим. Уйқуга кетиб уйғонмасликдан қўрқардим. Ҳамма нарсадан қўрқардим.

Тўпга қараб ўйнай олмасдим. [2023/24-йилги мавсумнинг Чемпионлар Лигаси чорак финалида Дортмунднинг "Боруссия"сига қарши ўйинда бирга бир вазиятни голга айлантира олмаганимда] хаёлимда фақат "финалга чиқиш имконини бой бердим" деган фикр айланарди. Ўйиндан кейин узоқ вақтгача кийиниш хонасида ёлғиз ўтирганман. Шунчаки йиғлагим келган", – деди "Милан" ҳужумчиси, у 2024/25-йилги мавсумнинг иккинчи ярмида "Галатасарой"да тўп сурган.

Мората шунингдек, Испания терма жамоасининг шифокори Оскар Селадага қўнғироқ қилиб, Еврога бора олмаслигини айтганини ҳам сўзлаб берди. Шундан сўнг Селада уни депрессиядан азият чеккан собиқ Испания терма жамоаси ярим ҳимоячиси Андрес Иньеста билан боғлаган. Иньеста 2009 йил августида яқин дўсти ва жамоадоши Даниэл Харқуэнинг вафотидан сўнг оғир руҳий ҳолатни бошдан кечирган эди.

Эслатиб ўтамиз, Алваро Мората иштирок этган Испания терма жамоаси 2024 йилда Европа чемпиони бўлди.