Манипуляция ва ҳақоратга йўл қўймаймиз!

Португалиянинг амалдаги чемпиони “Спортинг” президенти Федерику Варандаш жамоа тўрурари Виктор Дьёкереш билан юзага келган зиддият бўйича ўз фикр-мулоҳазаларини билдирди.

- Дьёкереш 63 та гол урди ва 10 та ассист қайд этди. Бу ажойиб натижа. Виктор Португалия майдонларида тшп тепган энг маҳоратли футболчилар бири эканига шубҳа йўқ.

Биз трансфер учун унинг шартномасида белгиланган бадал пули сўрамасликка келишиб олганмиз. Бори шу. Ўша учрашувда Дьёкерешнинг агенти аниқ сумма белгиланишини талаб қилиб туриб олд. Мен бир йилдан кейин нима бўлишини ҳеч ким билмаслигини айтиб, аниқ сумма белгиланишига қарши чиқдим. Бир йил ичида унинг нархи 40, 60 ёки 80 миллион евро бўлиши мумкин. Мен уларга трансфер учун шартномада кўрсатилган сумма – 100 миллион евро талаб қилинмаслигини кафолатладим.

“Спортинг” ўша бадал пулига ёпишиб олмайди, лекин шу билан бирга манипуляция ва ҳақоратларга ҳам йўл қўймайди.  “Спортинг” ҳозиргача Дьёкереш бўйича бирорта расмий таклиф олгани йўқ, - деди Федерику Варандаш.

Таъкидлаш лозимки, Виктор Дьёкерешни “Манчестер Юнайтед” ўз сафига чорлаяпти. Record нашрининг ёзишича, швед ҳужумчиси агар клуб унинг кетишига тўсқинлик қилса, "Спортинг" учун бошқа майдонга тушмаслигини уқтирди.

Гап шундаки, Дьёкереш ўтган йили ёзда ҳам трансфер нишонига айланган эди. Бироқ клуб унинг трансферига белгиланган 100 миллион евролик бадал пулини пасайтириши шарти билан жамоада бир йил ўйнаб беришга рози бўлганди.

Энди “Спортинг” хўжайинлари мавсумда тўпурарлик маҳоратини яна бир бор намойиш қилган ҳужумчини имкон қадар қимматроқ пуллашга ҳаракат қилаётгани Дьёкерешга ёқмаяпти.

Sport1 нашри журналисти Кристофер Михель Дьёкереш гарчи “Манчестер Юнайтед” келаси мавсум Еврокубокларга иштирок этмаса ҳам, тақдирини бу жамоа билан боғлашни истаётганини ёзди.