"Ҳамма нарсани биладиган одамлар кўп"— Аморим Рунининг гапларига жавоб қайтарди

"Манчестер Унитед" бош мураббийи Рубен Аморим Уейн Рунига нисбатан киноя билан жавоб қайтарди ва "таҳлилчи бўлиш осон" деб таъкидлади.

Руни Аморимнинг "Унитед"нинг мақсади Премьер-лигани ютиш бўлиши керак" деган фикрини "нодонлик" деб атади. Бу гаплар "Фулхэм"га Англия Кубогининг бешинчи босқичида мағлуб бўлгандан кейин айтилган эди.

BBC телеканалида шарҳловчи сифатида ишлаётган Руни шундай деди:

"Менимча, "Манчестер Юнайтед"нинг ҳозирги ҳолатидан келиб чиқиб, Премьер-лигани ютишни мақсад қилиш бир оз нодонлик, чунки улар ҳозир бу мақсаддан жуда узоқдалар".

Аморим Рунининг танқидига жавобан шундай деди:

"Бу бизнинг мақсадимиз (Премьер-лигани ютиш). Нодонлик – бу биз буни бу мавсум ёки кейинги мавсумдаёқ уддалаймиз деб ўйлаш. Мен ҳозир ҳамма нарсани биладиган одамлар кўпайганини тушунаман. Мен ҳам футболчилик фаолиятимни тугатгач, таҳлилчи бўлганман, ва биламан – бу жуда осон иш."

"Бизнинг мақсадимиз – Премьер-лигани ютиш. Балки бу мен билан эмасдир. Лекин биз, клуб ва раҳбарият, "Манчестер Юнайтед" тарихидаги буюк афсоналар сингари чемпион бўлишни хоҳлаймиз. Ҳозир биз қийин даврни бошдан кечиряпмиз, лекин мен нодон эмасман. Айнан шунинг учун мен 40 ёшимда "Манчестер Юнайтед"ни бошқараётган мураббийман."

"Манчестер Юнайтед" сўнгги марта 2013 йилда чемпионликни қўлга киритган. Клуб 1967 йилдан 1993 йилгача 26 йил давомида чемпион бўлолмаган эди.

Рунининг мураббийлик фаолияти ҳам муваффақиятли кечмади. У "Бирмингем" клубида атиги 83 кун ишлаганидан кейин истеъфога чиқарилди, шунингдек, "Плимут Аргайл"да 23 ўйинда бор-йўғи 4 ғалаба қозониб, лавозимидан бўшатилган эди.