Флик “Барса” футболчиларининг “бурнини пастга туширди”!

“Барселона” бош мураббийи Ханс-Дитер Флик футболчилар орасида тарқалаётган жамоанинг треблга эришиш имкониятлари ҳақидаги гап-сўзларга чек қўйди.

AS нашрининг ёзишича, германиялик тажрибали мураббийи жамоанинг ўз кучига ортиқча баҳо бериши тузатиб бўлмас оқибатларга олиб келишини таъкидлаган.

Флик ўз шогирдларига ҳали улар ҳеч нарса ютмаганини, совринларни қўлга киритиш учун олдинда узоқ ва машаққатли йўл борлигини уқтирди. Шунингдек, бош мураббий футболчиларни оммавий ахборот воситалари билан мулоқот ва ижтимоий тармоқларда ўз фикрини ёзишда катта гапирмасликка, бундай баёнотлар жамоага зиён келтириши ҳақида ўйлаб кўришга чақирди.

Айни пайтда каталонияликлар Испания чемпионатида 27-турдан кейин биринчи ўринда бормоқда. Бундан ташқари, “Барселона” Европа Чемпионлар лигасининг чорак финалида ва Испания кубогининг ярим финалига чиққан.