Эржан Токотаев: "Андижон"ни зўр фанатлари борлигини биламан, стадиондаги муҳитни ҳис қилиш учун якшанба кунги ўйинни интиқлик билан кутяпман"

“Андижон” клубининг ёзги трансферларидан бирига айланган қирғизистонлик тажрибали дарвозабон Эржан Токотаевни мухлислар яхши билишади.

Айниқса, унинг жаҳон чемпионати саралаш доирасида Қирғизистон терма жамоаси таркибида кўрсатган ажойиб ўйинлари барчада жуда илиқ таассуротлар қолдиргани рост.

Туркия чемпионатида фаолият олиб борган посбон энди “Андижон” шарафини ҳимоя қилади.

Клуб матбуот хизмати эса Эржандан интервью олди.

- Эржан, “Андижон” клубига хуш келибсиз! Ҳаммаси жуда тез юз берди. Сиз шундай бўлишини ўйлаганмидингиз?

- Катта раҳмат. Албатта, музокара жуда тез бўлди. Бир сутка давомида шартноманинг барча деталларини келишиб олдик. Натижада келишувга асосан жамоага қўшилишга тайёр бўлдим.

- Жамоадаги дастлабки таассуротлар қандай? Ўйлашимча, сиз “Андижон”даги илк кунингизданоқ мухлисларимизнинг кучини ҳис қилдингиз.

- Таассуротларим яхши. Барча йигитлар дўстона. Жамоа ёш ва янги коллективга тез киришиб кетдим. Мухлисларни машғулотда кўриш анча завқли бўлди. “Андижон” жамоасини жиддий ва жуда ҳам зўр фанатлари борлигини биламан. Машғулотда мухлисларнинг мени яхши сўзлар билан қўллаб-қувватлашаётганини эшитдим. Бундай сўзларни эшитиш мен учун жуда ҳам қувончли бўлди. Биласизми, стадиондаги муҳитни ҳис қилиш учун якшанба кунги ўйинни катта иштиёқ билан кутяпман.

- “Андижон”ни танлашингизнинг асосий сабаби нимада?

- Бунгача Европани бир қатор жамоалари билан гаплашгандик. Фаолиятимни Европада давом эттиришни хоҳлаб тургандим. Лекин буни бир қанча қийинчиликлари бор эди. Кейинчалик “Андижон”дан қўнғироқ бўлиб, жамоа мураббийлари мени кўришни истаётганини эшитганимдан сўнг кўп ўйланмадим ва рози бўлдим. Чемпионатнинг даражаси юқори. “Андижон” эса Осиё Чемпионлар лигасида ўйнайди. Шунингдек, ушбу шаҳар ўз уйимдан узоқ эмас. Энг асосийси, мураббийлар штаби менга ишонч билдиряпти ва менга ўйин амалиётини бермоқчи. Шу сабабли уларга раҳмат. Бу ҳам клубга ўтишимга туртки бўлди. 

- Маълумки, “ЖЧ-2026” 3-саралаш босқичида Қирғизистон термаси Ўзбекистон билан бир гуруҳда қатнашди. Жамоангизнинг иштирокини қандай баҳолайсиз?

- Терма жамоа ҳақида нима дейишим мумкин? Биринчи навбатда биз олдимиздаги вазифани бажара олмадик. Ҳеч бўлмаганда минимал ҳисобда кейинги босқичда иштирокимизни давом эттиришни истагандик. Иккинчи томондан биз яхши ўйинларни ўтказдик. Ҳар кимда ўзини кўрсатиш имконияти бўлди ва ким нимага қодирлигини кўрсатди. Рақобат кучли эди. Шу билан бирга Қирғизистон Осиёнинг кучли жамоалари қаторига кира олди, деб ўйлайман. Ҳамма футболчи катта тажриба тўплади. Бу эса бизга келажакда фақат ёрдам беради.

- Эржан, Қирғизистонда ҳам футбол ўсиб боряпти. Футбол мамлакатингизда биринчи рақамли спорт тури. Сизнингча, чемпионат қай даражада ривожланяпти?

- Футбол мамлакатда тез ривожланиб боряпти. Эски стадионлар реконструкция қилиняпти. Янги стадионлар қуриляпти. Маҳаллий чемпионатда янги жамоалар шаклланди ва рақобат кучайди. Футболчиларда кўпроқ ўйнашга имконият пайдо бўляпти. Ўйлайманки, яқин йиллар ичида чемпионат янада кучли даражага чиқади.

- Бунгача икки йил Туркия чемпионатида ўйнадингиз. У ерда фаолият олиб борганингиз сизни қанчалик ўзгартирди?

- Икки йил давомида Туркияда жуда яхши вақтларни ўтказдим. У ерда ўзим учун кўп нарсаларни ўзлаштирдим. Янги танишувлар, янги дўстлар, янги тажриба...Чемпионат ҳам етарлича кучли. Кўплаб мураббийлар билан ишладим. Ҳар биридан ўзига яраша янгилик олдим. Ҳар бир мураббий янги нарсаларни ўргатди. Ўрганганларим келажакда менга асқотади, деб ўйлайман. Жамоани иккита сабаб билан тарк этдим: Биринчи сабаби, шартномам тугаганди. Иккинчи сабаби, биз биринчи лигани тарк этдик ва иккинчи лигада эса легионерларнинг тўп суриши мумкин эмас экан. Шу сабабли клубни тарк этишга мажбур бўлдим.

- “Андижон” клуби фаолиятингизда янги чақириқ...

- Ҳеч қачон нима бўлишини олдиндан билмайсан. Ҳаммаси ўзимга боғлиқ. Барчасини яхши бажаришга ҳаракат қиламан. Клуб ва мухлислар мендан кутаётган барча талабни бажаришга ва уларнинг умидлари оқлашга қўлимдан келганича ҳаракат қиламан.

- Сизни “Андижон”га ўтишингиз Ўзбекистонда ҳам, Қирғизистонда ҳам анча эътиборни ўзига тортди. Буни ҳис қилдингизми?

- Ҳа, бу атмосферани жуда яхши ҳис қилдим. Мени жуда яхши кутиб олишди ва ёқимли бўлди. Тўғрисини айтсам, бундай эътиборни кутмагандим.