Жамоа Мбаппени уялтириб қўйди...

Франция чемпионати Лига 2 турнирида қатнашаётган “Кан” 31-турда “Мартига” жамоасидан 0:3 ҳисобида мағлубиятга учраб, янада қуйироққа шўнғиди.

“Кан” ўз даврида Лига 1 ва Франция кубоги баҳсларида ҳам ишончли ўйинлари билан мухлису мутахассислар эътиборини қозонган.  

Бироқ кейинги пайтда 111 йиллик тарихга эга жамоанинг ишлари юришмаяпти. Жорий мавсум тугашига уч тур қолганида “Кан” келаси мавсумни учинчи дивизионда бошлаши аниқ бўлиб улгурди. Бу жамоа 1983 йилдан бери бу қадар пастга қуламаган эди.

Қизиғи шундаки, Франция футболининг бугунги кундаги энг ёрқин футболчиси Килиан Мбаппе ўтган ёзда бу жамоанинг назорат пакетини сотиб олган эди. “Реал” юлдузи “Кан”ни қўлга киритиш учун 20 миллион еврога яқин маблағ сарфлаган.